Rekomandimi i FDA-së: Më pak kripë në ushqime, shkak i problemeve në zemër e tru

Administrata Amerikane e Ushqimit dhe Barnave publikoi një ditë më parë një rekomandim për pakësimin e kripës në produktet ushqimore të përpunuara.

Marrja në sasi të madhe e natriumit është lidhur prej kohësh me presionin e lartë të gjakut, i cili është shkaku kryesor i sulmeve në zemër dhe goditjeve në tru.

“Ajo që më shqetëson është sasia e natriumit që gjendet te ushqimi i përpunuar. Rreziqet e natriumit janë shumë. Ky është një hap në drejtimin e duhur në zvogëlimin e sasisë së përmbajtjes së natriumit në ushqimet e përpunuara “, u shpreh mjeku John Whyte.

Udhëzuesi i FDA parashikon reduktim të natriumit nga prodhuesit e ushqimeve, restorantet dhe operatorët e shërbimeve ushqimore në më shumë se 150 kategori ushqimesh të përpunuara, të paketuara dhe të përgatitura. Mesatarisht 3.400 miligram natriumi konsumohet në ditë në Shtetet e Bashkuara.

Udhëzimi kërkon të zvogëlojë marrjen mesatare të natriumit në 3.000 mg në ditë, një ulje prej 12%, gjatë dy viteve ardhshme.

Sipas FDA, më shumë se 70% e marrjes totale të natriumit vjen nga kripa e shtuar gjatë prodhimit të ushqimit dhe përgatitjes komerciale.

Agjencia bën me dije se përfitimi i shëndetit publik nga kufizimi i marrjes së natriumit vlerësohet të jetë i madh jo vetëm duke reduktuar sëmundjet e zemrës dhe goditjet në tru, por do të sjellë dhe miliarda dollarë kursime në kujdes shëndetësor.

LEXONI GJITHASHTU:

• Tranzicioni botëror në energjinë e pastër, specialistet e klimës: S’jemi në rrugën e duhur
• ‘Amy Winehouse’ në ankand, sendet personale të artistes mund të blihen edhe për 50 dollarë
• Fundi i Alitalia-s, kompania italiane mbyll aktivitetin pas goditjes nga COVID