Rënia e besueshmërisë për faktorin ndërkombëtar, analistët diskutojnë arsyet e publikut

Analistët kanë diskutuar mbi arsyet që kanë çuar në rënien e besueshmërisë tek ndërkombëtarët që rezulton në sondazhin e dytë të Euronews Albania dhe MRB, por dhe te qeveria e opozita. Plator Nesturi tha se, kjo panoramë vjen nga nisja e fushatës elektorale dhe interesi më i madh është tek aktorët vendas.

“Mendoj se gjithçka është e lidhur me fushatën elektorale. Në një farë mënyrë komuniteti ndërkombëtar nuk është lojtar pjesëmarrja bie dhe interesi për t’i dhënë pikë. Vota më shumë është e përcaktuar në funksion të fushatë elektorale. Ndikim mund ketë luajtur dhe mbyllja e kufijve”, tha ai.

Ndërsa Plarent Ndreca shprehet se rënia e vlerësimit për ndërkombëtarët mund të jetë e ndikuar nga situata e pandemisë.

“Nuk duhet të harrojmë që jemi në situatën e COVID-19 dhe kjo ndikon tek besueshmëria për ndërkombëtarët. Situata është e tillë nga pikëpamja psikologjike dhe shëndetësore dhe ul besueshmërinë. Besueshmëria lidhet me indiferencën e ndërkombëtarëve mbi atë që po ndodh në Shqipëri”, deklaroi ai.

Kurse drejtuesja e “Open Data Albania” Aranita Brahaj i komentoi uljet e besueshmërisë së ndërkombëtarëve nisur edhe nga fakti se liderët politikë në retorikën e tyre ua kanë faturuar dështimet pikërisht ndërkombëtarëve duke iu referuar këtu vaksinës kundër COVID-19. Ajo vuri theksin dhe tek rënia e besueshmërisë për qeverinë dhe opozitën.

“Politikanët dhe liderët ua kanë faturuar dështimin e tyre ndërkombëtarëve. Elektorati kërkon propozime konkrete, e ka shumë të vështirë ta besojë këtë tek mazhoranca që qeveris dhe pret më shumë mbase nga opozita”, u shpreh ajo.

Gjergji Vurmo, drejtues i programit Instituti për Demokraci dhe Ndërmjetësim vërejti diferencën mes besueshmërisë për pushtetin lokal dhe atë qendror në një kohë kur është Partia Socialiste që i kontrollon të dy pushtetet.

Lexoni gjithashtu:

Bie besimi në institucione, shqiptarët besojnë më shumë përfaqësuesit fetarë