Rezolutë kundër Hungarisë, PE voton pro masave ndëshkuese për ligjin kundër LGBTQ

Parlamenti Evropian ka votuar në favor të marrjes së veprimeve urgjente ligjore ndaj Hungarisë, në lidhje me ligjin e ri që ndalon përshkrimin e homoseksualitetit për të rinjtë nën 18 vjeç.

Ligjvënësit evropianë deklaruan se ligji shkel vlerat dhe parimet mbi të cilat është themeluar Bashkimi Evropian.

Parlamenti shtoi se ligji ishte një tjetër shembull i zhbërjes së qëllimshme të të drejtave themelore të njeriut në Hungari.

Nga ana e tij, kryeministri hungarez Viktor Orban insiston se politikat e tij janë çështje e brendshme për Hungarinë dhe jo për ata që i quan “burokratët e Brukselit”.

Në një rezolutë të miratuar të enjten me 459 vota pro, 147 kundër dhe 58 abstenim, eurodeputetët deklaruan se zhvillimet e fundit në Hungari erdhën pas një modeli të ashpër censure politike.

Parlamenti i bëri thirrje Komisionit Evropian që të përdorë një mjet të ri që i lejon BE-së të reduktojë buxhetin për vendet anëtare në rast të cenimit të sundimit të ligjit, për t’u siguruar që qeveria hungareze të kthejë mbrapsht vendimin e saj.

Gjithashtu, rezoluta e miratuar kërkon veprim urgjent kundër qeverisë së djathtë të Orban në Gjykatën Evropiane të Drejtësisë.

Kritikët thonë se ligji i ri i Hungarisë, që sapo ka hyrë në fuqi, barazon homoseksualitetin dhe pedofilinë.