Rezolutë kundër referendumeve, OKB, SHBA dhe NATO dënojnë Rusinë

Organizata e Kombeve të Bashkuara (OKB) do të paraqesë një rezolutë që dënon ‘referendumet’.

Duke folur gjatë një takimi të Këshillit të Sigurimit të OKB-së, Presidenti i Ukrainës Volodymyr Zelensky tha se Ukraina nuk do të negociojë me Rusinë pas “pseudo-referendumeve”, në katër rajonet e zhvilluara nga Moska.

“Njohja nga Rusia e pseudo-referendumeve si “normale”, zbatimi i të ashtuquajturit skenar i Krimesë dhe një përpjekje tjetër për të aneksuar territorin ukrainas, do të thotë se nuk ka asgjë për të folur me Presidentin aktual të Rusisë”, u shpreh Zelensky.

Linda Thomas-Greenfield, ambasadorja e SHBA-së në Kombet e Bashkuara, i quajti referendumet “të rreme” dhe tha se ato ishin “të paracaktuara në Moskë”.

Gjithashtu, Sekretari amerikan i shtetit Antony Blinken u zotua se Perëndimi nuk do ta njohë kurrë aneksimin e territorit ukrainas nga Rusia.

Sekretari i Përgjithshëm i NATO-s, Jens Stoltenberg, shprehu mbështetjen e tij për Ukrainën dhe tha se referendumet e aneksimit, të organizuara nga Moska, janë një “mashtrim” dhe “një shkelje e hapur e ligjit ndërkombëtar”.

“Referendumet e rreme, retorika bërthamore, e kombinuar gjithashtu me mobilizimin e forcave të armatosura në Rusi: e gjithë kjo është një përshkallëzim serioz i konfliktit”, u shpreh Stoltenberg.

Zyrtarët e instaluar nga Moska në rajone tani po kërkojnë mbështetje pothuajse totale midis atyre që morën pjesë në votimet për bashkimin me Rusinë. Zyrtarët pro-Moskës thanë se të katër rajonet e okupuara të Ukrainës votuan për t’u bashkuar me Rusinë.

Sipas tyre, 93% e votave në rajonin e Zaporizhzhia mbështetën aneksimin, 87% në rajonin Kherson, 98% në Luhansk dhe 99% në Donetsk. Referendumet filluan më 23 shtator, ku zyrtarë të armatosur shkonin derë më derë për të mbledhur vota.

LEXONI GJITHASHTU

• Pro bashkimit me Rusinë, Putin shpall të premten vendimin për referendumet
• Pse referendumi i sotëm rrezikon ‘fillimin e fundit të luftës’ në Ukrainë?
• Çfarë është BRICS – dhe rendi i ri botëror që ai propozon?