Ricky Martin sulmohet me gaz lotsjellës gjatë koncertit në Malin e Zi

Një incident ndodhi gjatë koncertit të  Ricky Martin në Mal të Zi kur një nga personat e pranishëm mes audiencës hodhi gaz lotsjellës drejt skenës, duke ndërprerë përkohësisht performancën e tij dhe duke detyruar publikun të evakuohej.

Incidenti ndodhi në Sheshin e Pavarësisë në Podgoricë, ku artisti 54-vjeçar po performonte si pjesë e turneut të tij evropian “Ricky Martin Live”. Sipas një deklarate nga menaxheri i tij i marrëdhënieve me publikun, Rodine Alcala, gazi lotsjellës u hodh drejt skenës gjatë koncertit, duke shkaktuar panik dhe duke detyruar publikun të evakuohej përkohësisht nga zona.

Siç thuhet në njoftim: ” Gjatë koncertit të sonte të Ricky Martin në Mal të Zi, ku artisti po niste pjesën evropiane të turneut të tij “Ricky Martin Live”, një person qëlloi gaz lotsjellës drejt skenës, duke bërë që koncerti të ndërpritej papritur, ndërsa pjesëmarrësit u evakuuan nga vendi i ngjarjes dhe u dhanë ndihmë”.

Më pas sqarohet se, për arsye sigurie, këngëtari dhe ekipi i tij u larguan menjëherë nga skena, derisa autoritetet lokale përcaktuan se situata ishte nën kontroll. ” Si masë paraprake, Ricky Martin dhe i gjithë ekipi i tij u larguan menjëherë nga skena, ndërsa personeli i sigurisë dhe autoritetet lokale punuan për të kontrolluar incidentin dhe për të siguruar sigurinë e të pranishmëve “, thuhet në njoftim.

Pavarësisht rekomandimeve të bashkëpunëtorëve të tij për të mos e vazhduar koncertin, artisti vendosi të kthehej në skenë pasi Autoritetet konfirmuan se nuk kishte më rrezik për publikun. ” Edhe pse anëtarët e ekipit të artistit rekomanduan që koncerti të mos vazhdonte, kur Autoritetet konfirmuan se situata ishte nën kontroll dhe se pjesëmarrësit mund të ktheheshin të sigurt, Ricky Martin vendosi të vazhdonte performancën live në mënyrë që të përmbushte angazhimin e tij ndaj fansave të tij”, shtoi deklarata. Vërehet se turneu evropian i këngëtarit vazhdon si zakonisht me paraqitjet e tij të ardhshme të planifikuara.