Rikthehen veprat që grabitën nazistët, trashëgimtarët marrin koleksionin miliona €

7 piktura me vlerë rreth 10 milionë dollarë të grabitura nga nazistët gjatë Luftës së Dytë Botërore u janë kthyer trashëgimtarëve.

Shtetet e Bashkuara të Amerikës i kanë rikthyer trashëgimtarëve 7 vepra arti të piktorit ekspresionist Egon Schiele.

Fritz Grünbaum zotëronte 81 piktura të artistit, dhe për më shumë se 20 vjet, trashëgimtarët e tij janë përpjekur të rimarrin artin e plaçkitur gjatë Luftës së Dytë Botërore nga nazistët dhe që më pas u shit në koleksione të muzeve të ndryshëm në Amerikë.

7 pikturat kanë vlerë monetare 9.5 Milionë $ dhe vepra me vlerën më të lartë është “I Love Antithesis” me vlerë 2.7 Milionë $.”

Muzeu i Artit Modern, Biblioteka & Muzeu Morgan, të dy në Nju Jork, si dhe Muzeu i Artit Santa Barbara në Kaliforni, ku mbaheshin pikturat janë dakorduar t’i dorëzonin vullnetarisht tek prokurorë pasi mësuan se veprat ishin të vjedhura.

Gjatë një ceremonie e cila u konsiderua historike nga Alvin Bragg, Prokurori i Qarkut të Manhattan, shtatë pjesët e Schiele iu dorëzuan familjes.

Veprat e Schiele ishin shpallur “art i degjeneruar” nga Adolf Hitleri. Ato u grabitën nga zyrtarët nazistë pas arrestimit të pronarëve të koleksionit dhe më pas u shitën për të financuar Partinë Naziste.