Rikthimi i vështirë në klasa, nxënësit nën masa të rrepta sigurie

Normalitet në këto kohë pandemie do të thotë edhe të kesh mundësi të shkosh në shkollë.

E pas dy muajsh izolim fëmijët në Poloni rikthehen në bankat e shkollës. Por jo të gjithë janë të lumtur.

“Është paksa shqetësuese dhe me kaq shumë të infektuar nuk mendoj se rikthimi do të zgjasë shumë. Përse mësuesit nuk po vaksinohen të parët? Mendoj se është më e rëndësishme sesa të injektohen të moshuarit”, u shpreh Marta Mikiel.

Por, ekspertët paralajmërojnë se qëndrimi i gjatë i fëmijëve në shtëpi shton presionin psikologjik mbi ta.

Edhe në Moskë që nga tetori nxënësit rikthehen në shkollë.

Masa specifike janë ndërmarrë për të minimizuar përhapjen e virusit.

Fëmijëve u matet temperatura dhe pushimet janë të ndërprera.

“Jam shumë e lumtur të shoh shokët e klasës dhe të njohurit e mi sepse pa miq është e vështirë të mësosh”, u shpreh një nxënës.

“Është një ambient ndryshe në shkollë, të paktën nuk kemi mësimin në distancë. Mund të flasim me shokët e shoqet, mësuesit”, tha një tjetër.

Pas dhjetë muajsh mësim në distancë, edhe në Romë gjimnazet janë rihapur, por duke lejuar që të rikthehen në klasa gjysma e nxënësve në mënyrë që të sigurohet distanca fizike.

Por, shumë të rinj zgjodhën të mos kthehen në klasa por të protestojnë. Ata duan më shumë investime për të zëvendësuar klasat e përgjysmuara dhe transporti më të sigurt publik për të reduktuar përhapjen e virusit.