Robotët zëvendësojnë njeriun në Greqi

Një flotë robotësh të verdhë, të fuqizuar nga inteligjenca artificiale, ka trefishuar kapacitetet e shërbimit postar në Greqi.

55 robotët e vegjël, të pajisur me 4 rota, lëvizin në pistat e qendrës postare të Greqisë që ndodhet në zonën Kryoneri, në periferinë veriore të Athinës.

Gjithçka bëhet në kuadër të programit të qeverisë për ristrukturimin digjital, që synon menaxhimin e volumit në rritje të blerjeve onlline.

Robotët skanojnë automatikisht kodin postar, peshojnë pakon dhe të drejtuar nga sensorët e çojnë atë në vendin e duhur, në një platformë në qendrën e klasifikimit.

“Deri më sot shpërndarja e pakove në platformë bëhej në mënyrë manuale, shpesh herë me gabime, duke shkaktuar vonesa në dërgim për klientët tanë dhe duke rritur koston për kompaninë”, shprehet George Constantopoulos, drejtor i Postës.

Tani deri në 80 për qind e ndarjes së pakove bëhet nga robotët e verdhë, që kanë rritur shpejtësinë e ndarjes me 250%, ka saktësuar kompania.

“Qëllimi i kësaj nuk është të zëvendësojmë njerëzit me robotë, por të rrisim fuqinë e punës së njeriut dhe ta bëjmë atë më efikase”, tha Constantopoulos.

Robotët mund të lëvizin 168 mijë pako me peshë 15 kg në ditë. Çdo 4 orë, ata kanë nevojë të karikohen me energji, proces që zgjat 5 minuta.