Rreziku nga varianti ‘Delta’, më shumë liri për britanikët, Portugalia e frikësuar nga virusi i shfaqur në Indi

Sekretari i Transportit në Mbretërinë e Bashkuar, Grant Shapps konfirmoi se Malta, Madeira, Ishujt Balearikë, disa territore të jashtme të Mbretërisë së Bashkuar dhe Ishujt Karaibe, duke përfshirë Barbados, do të shtohen në listën e “gjelbër” të qeverisë duke nisur nga e mërkura e 30 qershorit.

Kjo do të thotë që këto territore mund të fillojnë të mirëpresin përsëri turistët nga Mbretëria e Bashkuar. Ishulli i Majorkës është i gatshëm të mirëpresë turistët britanikë, pasi ishujt Balearikë të Spanjës u shtuan në listën e vendeve të Mbretërisë së Bashkuar që njerëzit mund të vizitonin pa pasur nevojë për karantinë.

Nga e shtuna, 26 qershor, maska në publik nuk do të jetë më e detyrueshme në Portugali.  Njerëzit do të lejohen të qëndrojnë pa u mbuluar në hapësira të jashtme, ku është e mundur të ruhet një distancë e sigurt prej 1.5 metrash.

Dy muaj pasi Portugalia filloi të lehtësonte një bllokim të zgjatur, rajoni i Lisbonës po kthehet mbrapsht për shkak të një rritjeje të shkaktuar nga varianti ‘Delta’ i coronavirusit, i cili tani përbën më shumë se 7 në 10 infeksione të reja në kryeqytet. Vendi raportoi 1556 infeksione të reja të enjten, numri më i lartë që nga 20 shkurti. Pak më shumë se 1000 prej tyre ishin në rajonin e Lisbonës.

Kryeministri Antonio Costa paralajmëroi se problemi nuk është vetëm në Portugali. Ekspertët parashikojnë që varianti ‘Delta’, i cili e ka origjinën në Indi, do të përbëjë 90% të infeksioneve të reja në të gjithë Evropën, deri në fund të gushtit.

“Portugalia është në këtë pikë, qartazi në zonën e kuqe, kështu që kushtet nuk janë përmbushur për të vazhduar me rihapjen siç është planifikuar”, u shpreh zëdhënësja e kabinetit qeveritar.

Infeksionet me coronavirus vazhdojnë të rriten në Rusi, ku autoritetet raportuan 20 182 raste të reja të enjten dhe 568 viktima. Nivelet janë të larta që nga fundi i janarit.

Një rritje e rasteve goditi Rusinë në fillim të këtij muaji, ndërsa autoritetet përpiqen të bindin popullatën se vaksinimi është i nevojshëm. Deri të mërkurën, vetëm 20.7 milionë rusë, ose vetëm 14% e popullsisë kishin marrë të paktën një dozë vaksine, ndërsa 16.7 milionë, ose 11%, janë imunizuar plotësisht.

LEXONI GJITHASHTU:

• Varianti Delta rrezikon lehtësimin e masave anti-COVID në Britani të Madhe
• Britania e Madhe e frikësuar nga varianti delta, Spanja e hapur për të vaksinuarit