Rrëzohet avioni i forcave ajrore, të paktën 45 të vdekur në Filipine

Të paktën 45 persona mbetën të vrarë kur një avion i forcave ajrore filipinase u rrëzua të dielën në jug të vendit dhe mori menjëherë flakë.

Avioni i llojit “Lockheed C-130” u rrëzua në lokalitetin Patikul, në ekstremin jugor të shtetit arkipelag, ku ushtria ka zhvilluar një betejë të gjatë kundër militantëve islamikë të grupit “Abu Sajaf” dhe fraksioneve të tjera.

Ministri i Mbrojtjes deklaroi se nga incidenti dhjetëra persona të tjerë kanë mbetur të plagosur dhe saktësoi se në bord ndodheshin 92 persona.

Ndërsa një zëdhënës i ushtrisë tha se nuk kishte të dhëna që të tregonin se avioni kishte rënë pre e një sulmi.