Rritet çmimi i qumështit, nga korriku bulmeti 10% më i shtrenjtë

Çmimi i qumështit dhe nënprodukteve të tij pritet të rritet në treg nga data 1 korrik.

Janë vetë përpunuesit e qumështit ata që lajmërojnë shtrenjtimin me 10 për qind, për shkak të ndryshimit të çmimit të plastikës nga vendet furnizuese dhe shtrenjtimi i çmimit të energjisë nga rinovimi i kontratave në tregun e lirë.

Rritja e çmimit të plastikës, me të cilat bëhet edhe ambalazhimi i bulmetit, ishte lajmëruar 3 muaj më parë, nga Greqia e Italia, dy shtetet potenciale që furnizojnë vendin tonë.

Ndërkohë, kjo rritje çmimesh duket se nuk prek vetëm tryezën, por edhe lëndë të tjera të para, si ato që lidhen me fushën e ndërtimit apo edhe tregun e karburanteve.

Për hidrokarburet, çmimet janë rritur për herë të tretë brenda këtij viti në javën e fundit të qershorit.

Edhe kjo lëvizje ishte lajmëruar për shkak të hapjes së qarkullimit global dhe rritjes së kërkesës për naftë, benzinë e gaz.

Në pikat e tregtimit të operatorëve kryesorë në vend, nafta dhe benzina po shiten me 5 lekë më shtrenjtë.

Kjo situatë në tregje mbetet e pasigurt, ndërkohë që ekspertët mendojnë se ajo do të stabilizohet pas muajve shtator, apo tetor.

LEXONI GJITHASHTU:

• Eksperti i ekonomisë, Stringa propozon disa hapa për përmirësimin e situatës ekonomike në vend
• Shqipëria e fundit në Europë për konsumin dhe të ardhurat për frymë, thotë Eurostat
• Raporti i Eurostat: Vendet ku njerëzit nuk ia lejuan dot vetes të ngrohnin shtëpitë