Rritet fatura e koncesioneve; 13.8 mld lekë për Rrugën e Arbrit, skanimin e kontratat në shëndetësi

Taksapaguesit shqiptarë do të paguajnë afro 14 miliardë lekë për kontratat e Partneritetit Publik-Privat gjatë vitit të ardhshëm, ose 1.4 miliardë lekë më shumë se këtë vit.

Bëhet fjalë për detyrimet që qeveria dhe bashkia e Tiranës do të derdhin për llogari të 13 kontratave aktive koncesionare, ku pjesa më e madhe e fondeve do të shkojë për ndërtimit e Rrugës së Arbrit (3 mld lekë) dhe koncesionit të skanimit në dogana (2 mld lekë).

Katër koncesionet në fushën e shëndetësisë po ashtu kanë një kosto të lartë pagesash prej 4.7 miliardë lekësh në total. Ndërkohë, 1.5 miliardë lekë janë parashikuar të shkojnë për inceneratorin e Tiranës në Sharrë.

Pagesat për një pjesë të kontratave, të tilla si inceneratori i Fierit apo tre koncesione në shëndetësi do të mbyllen brenda vitit 2025, ndërkohë që buxheti do të paguajë për inceneratorin e Tiranës dhe rrugën Milot-Morinë pagesa të rregullta deri në vitin 2047.

Në buxhetin e vitit 2022 detyrimet që shteti paguan për koncesionarët janë në nivelin 3.1%, një rregull fiskal ky i paracaktuar për të mos tejkaluar kufirin 5% të ardhurave vjetore.