Rritja e çmimit të energjisë, Preçi: Çështje keqmenaxhimi, Shqipëria e pandikuar nga tregjet ndërkombëtare

Eksperti i ekonomisë, Zef Preçi tha për Euronews Albania se synimet për rritje të çmimit të energjisë në vendin tonë nuk lidhen me ndikimin e tregjeve ndërkombëtare, të cilat siç tha mund të ndikojnë, por nuk janë përcaktuese në ekonominë tonë.

Problemet, tha eksperti, janë pasojë e keqqverisjes dhe keqmenaxhimit të sistemit energjetik  në vend.

Sipas z. Preçi, me prodhimin e brendshëm, nëse do të menaxhohej siç duhet, Shqipëria e ka mundësinë jo të vetëm të mbulojë nevojat e veta për energji, por edhe të eksportojë.

“Fakti që ekonomia jonë është e palidhur me ekonominë ndërkombëtare në sektorë strategjikë, por që varet vetëm nga importet e ushqimeve, ndikimi i jashtëm duhet vlerësuar, por nuk është përcaktues. Përcaktues është keqmenaxhimi i shpërndarjes në sistem, që ka përkeqësuar ekonominë. Shqipëria importon gjithë sasinë e karburanteve që konsumon, ndërkohë që baras me këtë sasi është prodhimi vendas. Me prodhimin e brendshëm mund të mbulonim jo vetëm nevojat tona, por edhe të eksportonim”, tha eksperti i ekonomisë.

Ai i vlerësoi si të kushtueshme dhe të dyshuara për korrupsion blerjet emergjente të energjisë, ndërkohë që theksoi se teoritë që qarkullojnë për rritje të çmimit të energjisë vetëm për bizneset janë të rrezikshme.

Sipas z. Preçi, rritja e çmimit të energjisë për bizneset do të ketë efektin e pritshëm domino, që do të rëndojë drejtpërdrejtë në ekonominë e qytetarëve.

LEXONI GJITHASHTU:

• Rritja e çmimit të karburanteve nga kriza botërore e energjisë, thotë Rama
• Eksperti i ekonomisë: Rama po shtron rrugën për rritjen e çmimit të energjisë, asnjë masë zbutëse