Rritja e infektimeve rikthen zonat e kuqe në Greqi, Suedia lehtëson masat

Situata nga pandemia në shtete të ndryshme është duke u zhvilluar në nivele të ndryshme. Disa rajone në Greqinë Veriore, Selaniku, Larisa, Halkidiki, kanë shënuar nivelin më të lartë të alarmit të transmetimit të coronavirusit, duke arritur në shkallën 4 në hartën epidemiologjike të shtetit fqinj.

Rajonet që cilësohen me nivelin e “kuq” vendosin një shtetrrethim brenda natës, një ndalim 24-orësh në të gjitha vendet argëtuese, përfshirë bare dhe kafenetë. Sidoqoftë, asnjë njoftim zyrtar nuk është bërë ende nga autoritetet greke.

Ndërkohë, vdekjet nga coronavirusi  kanë arritur një rekord tjetër në Rusi me 857 viktima gjatë ditës së mërkurës. Shkalla e vaksinimit në Rusi mbetet e ulët me vetëm 28%. Suedia nga ana tjetër lehtëson masat kufizuese  të COVID-19 duke i dhënë fund shumicës së kufizimeve në vendet publike, siç janë restorantet, teatrot dhe stadiumet.

Ndonëse është vënë re se infeksionet janë shtuar javët e fundit për shkak të variantit Delta, vdekjet nga COVID-19 kanë mbetur në nivele ulëta.

Suedia ka ndjekur një politikë më liberale sa i përket menaxhimit të pandemisë, duke shmangur bllokimet e forta gjatë gjithë kohës  dhe duke u mbështetur shumë në rekomandimet vullnetare në lidhje me çështje të tilla si distancimi fizik dhe higjiena. Rreth 75% e suedezëve të moshës 16 vjeç e lart janë plotësisht të vaksinuar. Edhe Portugalia e cila ka shkallën më të lartë të të vaksinuarve 85% të popullsisë,  pritet që gjatë muajit të ardhshëm të heq një pjesë të madhe të kufizimeve.