Rruga Korçë-Ersekë, ARSH “fryn” kostot, 5 mln euro për 1 km

Loti i dytë i rrugës Korçë-Ersekë ka marrë dritën jeshile për t’u ndërtuar, teksa Autoriteti Rrugor Shqiptar ka shpallur këto ditë tenderin, ku fton operatorët të futen në garë. Në fakt, objekt i tenderit, nuk duket të jetë ndërtimi i plotë i rrugës, por vetëm një pjesë e lotit 2 me gjatësi 4 km, ndërsa fondi në dispozicion është 2.4 miliardë lekë, ose 20 milionë euro. 

Ky prokurim ka nxitur Partinë Demokratike të denoncojë për kosto të fryra, kreun e ARRSH-së, Ergys Verdho, i cili ka marrë drejtimin e institucionit në tetor 2019 pas dorëheqjes së Sonila Qatos.

“Në rrugën Korçë-Ersekë vjedhja është e tmerrshme. Do të ndërtojnë 1 kilometër me 5 milionë euro kosto. Është kosto 5 herë më e lartë sesa segmentet e tjerë të së njëjtës rrugë. Edi Rama ka planifikuar që për vetëm 4 kilometra të shpenzojë 20 milionë euro”, thotw Ervin Minarolli, Sekretar i Burimeve Njerëzore në PD.

Aishtoi se “sipas standardit të Bankës Botërore një rrugë e tillë, kategoria C, nuk kushton më shumë se 1 mln euro/km”. 

“Me të njëjtën kosto, në të njëjtën rrugë, janë ndërtuar që nga viti 2012 rreth 18 kilometra, me rreth 15 milionë euro. Pra, ne e projektuam me më pak se 1 milionë euro për kilometër”, tha  më tej Minarolli.

Rruga e re, Korçë-Ersekë e cila eliminon qafën e Qarrit,  ka nisur të ndërtohet në vitin 2013 dhe deri tani është shtruar vetëm loti i parë, 17.6 km, i cili ka kushtuar 2.5 mld lekë. Vlera e investimit fillimisht ishte 1.9 mld lekë, por për shkak të mungesës së fondeve, në vitin 2017 u lëvruan edhe 466 mln lekë për asfaltimin.

Edhe pse gara është ende e hapur, PD hedh dyshime se tenderi është i paracaktuar për Ndue Kolën, njeri i afërt me kryeministrin Edi Rama.

Rruga Korçë-Ersekë

Loti 1 (2013-2017)                           Loti 2 (2020-…)

20 mln euro                                       20 mln euro                            

17.6 km                                             4.1 km

1,1 mln euro/km                                5 mln euro/km