Rusët në pozicione mbrojtëse në Kiev, nuk avancojnë

Raportohet se trupat ruse po marrin pozicione mbrojtëse jashtë Kievit në vend që të avancojnë. Bombardimet e herëpashershme po godasin zonat e banuara.

Sot mbushen një muaj që nga dita kur presidenti Putin nisi pushtimin e Ukrainës duke vrarë me miliona njerëz, duke zhvendosur miliona ukrainas e duke rrënuar qytete të shumta. Luftimet vijojnë në të gjitha frontet.

Kryetari i bashkisë së Kievit, Vitali Klitschko është më optimist duke pohuar se forcat ukrainase po i mbajnë larg forcat ruse.

“Ne morëm informacion nga burime zyrtare se qyteti i vogël i Makariv dhe pothuajse i gjithë Irpin është tashmë nën kontrollin e ushtarëve ukrainas”, u shpreh Vitali Klitschko, kryebashkiak i Kievit.

Edhe në Kherson, i cili është nën pushtimin rus, protestuesit sfiduan gazin lotsjellës rus ndërsa vazhduan t’i rezistonin agresionit. Ditën e djeshme u ngritën nëntë korridore evakuimi, por asnjë për Mariupolin ku thuhet se banorët janë pa ushqim.

Sekretari amerikan i Shtetit, Antony Blinken ka konfirmuar se qeveria e tij beson me vendosmëri se forcat ruse kanë kryer krime lufte në Ukrainë. Organizata për Siguri dhe Bashkëpunim në Evropë ka filluar tashmë hetimet.

“Që nga 15 marsi do të ketë një ekip faktmbledhës që do të shqyrtojë shkeljet e rënda të të drejtave të njeriut, shkeljet e ligjit humanitar, krimet e mundshme të luftës dhe krimet kundër njerëzimit. Ai do ta përpilojë informacionin në një raport publik që do të dalë afërsisht pas tre javësh dhe atëherë ata do ta plotësojnë atë material  në juridiksione të tjera përkatëse si Gjykata ndërkombëtare e drejtësisë”, tha Michael Carpenter, ambasador i SHBA në OSBE.

Rusia zhvilloi funeralin për oficerin e lartë detar të vrarë në Ukrainë. NATO vlerëson se 7.000 deri në 15.000 ushtarë rusë janë vrarë në katër javët e luftës në Ukrainë. Për krahasim, Rusia humbi rreth 15.000 trupa gjatë 10 viteve në Afganistan.

LEXONI GJITHASHTU:

• Mblidhet sot samiti i NATO-s për luftën në Ukrainë
• Zelenski thirrje për protesta globale në mbështetje të Ukrainës