Rusia në lindjen e mesme, i dërguari i Putin në Teheran për të diskutuar për krizën

Sekretari i Këshillit rus të Sigurisë Kombëtare, Sergei Shoigu ka mbërritur këtë të hënë në Teheran për t’u takuar dhe biseduar me autoritetet iraniane.

Sipas agjencisë së lajmeve “Tass”, ish-ministri i Mbrojtjes do të takohet me presidentin Masud Pezeshkian dhe kreun e shtabit të përgjithshëm të forcave të armatosura, Mohamad Bagheri.

Sipas burimit mediatik, gjatë takimeve do të diskutohen aspekte të ndryshme të sigurisë si rajonale edhe globale.

Lëvizja e Moskës, aleate e Teheranit, vjen pasi Shtetet e Bashkuara njoftuan të shtunën vendosjen e anijeve dhe avionëve luftarakë shtesë në Lindjen e Mesme për të mbrojtur Izraelin nga një sulm i mundshëm i Republikës Islamike.

Një zëdhënëse e Departamentit të Mbrojtjes deklaroi se angazhimi i armatimeve shtesë do të përmirësojë mbrojtjen për Izraelin dhe do të sigurojë që Shtetet e Bashkuara të jenë gati t’i përgjigjen çdo pasigurie.

Lëvizja e Uashingtonit përfshinte raketa balistike dhe sisteme mbrojtëse, si dhe avionë luftarakë.

Ndërkohë, të hënën sekretari i Shtetit, Antony Blinken ka konfirmuar se sulmi i Iranit dhe lëvizjes Hezbollah ndaj shtetit hebre mund të ndodhë që sot.

Lajmin e bën të ditur agjencia “Aksios”, që citon burime amerikane të informuara.

LEXONI GJITHASHTU:

• Rusia pretendon se ka marrë nën kontroll dy vendbanime në Donjeck
• Irani: Lideri i Hamasit u vra nga një raketë me rreze të shkurtër veprimi