Rusia përpiqet të kontrollojë rrjetet sociale me qëllim shtypjen e opozitës

Autoritetet ruse po përpiqen të bllokojnë postimet e rrjeteve sociale që bëjnë thirrje për tubime masive kundër arrestimit të kritikut të qeverisë ruse, Alexei Navalny. Autoritetet i kanë dërguar kompanitë e mediave sociale në gjyq, duke kërcënuar madje se do të bllokojnë askesin në platformat e tyre në Rusi.

Seancat gjyqësore kanë filluar ditën e sotme, në Moskë. Platformat e shënjestruara nga autoritetet ruse janë Twitter, Google, Facebook, TikTok dhe Telegram, të gjitha me pretendimin se kanë dështuar të fshijnë postimet që ftojnë të rinjtë për të marrë pjesë në protesta të paligjshme dhe që autoritet ruse kanë tentuar t’i bllokojnë.

Muajin e kaluar, Roskomnadzori rus filloi të akuzonte Twitter-in, duke thënë se platforma nuk kishte arritur të përmbushte kërkesat e parashtruara për të fshirë përmbajtjen e ndaluar. Më 16 mars, Roskomnadzori paralajmëroi se nëse Twitter nuk do të respektonte kërkesat për fshirjen e përmbajtjes së ndaluar brenda një muaji, do të konsideronte bllokimin e aksesit në këtë platformë në shtetin rus.

Përmes platformave të rrjeteve sociale gjatë këtij viti, me mijëra rusë janë thirrur që të dalin në protestë për të kërkuar lirimin e aktivistit të burgosur të opozitës, Navalny. Vala e demonstratave, më e madhja ndër vite, ka përbërë një sfidë të madhe për Kremlinin.