Rusia sanksionon Presidentin e Parlamentit Europian David Sassoli

Moska ka ndaluar hyrjen një sërë zyrtarësh të famshëm të Bashkimit Europian në kundërpërgjigje të sanksioneve të ndërmarra nga BE në mars mbi disa funksionarë rusë.

Përmes një deklarate për shtyp, qeveria ruse njoftoi se Presidenti i Parlamentit Europian, David Sassoli, ishte ndër tetë zyrtarët e sanksionuar.

“Bashkimi Europian po vijon politikat e njëanshme dhe masat shtrënguese të jashtëligjshme mbi qytetarët dhe organizatat ruse”, thuhej në deklaratë.

Ndër autoritetet e sanksionuar nga Moska janë politikania çeke Vera Jourova e cila mban dhe postin e zv-presidentes së Komisionit mbi vlerat dhe transparencën, kryeprokurorin gjerman Jorg Raupach si dhe politikanin francez Jacques Maire.

Në njoftim thuhet se lëvizja vjen si kundërpërgjigje ndaj sanksioneve të ndërmarra në mars nga BE, si ndalimi i udhëtimeve dhe ngrirja e aseteve së një sërë zyrtarësh rusë për abuzime me të drejtat e njeriut dhe burgosjen e Alexei Navalny.

Marrëdhëniet midis Moskës dhe BE janë vështirësuar që kur Rusia aneksoi Krimenë në 2014 dhe mbështeti separatistët pro-rusë gjatë luftës në Ukrainën lindore.

Shefi i diplomacisë së BE Josep Borrell është shprehur se Rusia “po shkon drejt kthimit në një shtet autoritar dhe po devijon nga Europa”, pas një vizite në Moskë për të diskutuar mbi çështjen e Navalny.

Lexoni gjithashtu 

• Luftë diplomatike Rusi-BE, Moska dëbon 7 diplomatë nga Sllovakia dhe vendet baltike
• “Lironi Alexey Navalny”, rikthehen protestat në Rusi, arrestohen mbi 1500 persona
• Rusia i kundërpërgjigjet ShBA-së, dëbon 10 diplomatë nga Moska