Rusia thotë se baza ushtarake në kufirin me Ukrainën është një përgjigje ndaj ‘kërcënimeve’ të NATO-s

Ministri i Mbrojtjes i Rusisë, Sergei Shoigu ka pretenduar që baza ushtarake pranë Ukrainës është një përgjigje ndaj asaj që ai e përshkroi si kërcënime nga NATO.

Të martën, duke folur gjatë një vizite në një bazë detare në Gadzhiyevo, Sergei Shoigu tha se vendosja e bazës ushtarake në Rusinë perëndimore ishte pjesë e stërvitjeve të gatishmërisë që do të vazhdonin për dy javë.

Në tre javët e kaluara, ushtria ruse vendosi dy ushtri dhe tre formacione ajrore në rajonet perëndimore, një lëvizje që ka shqetësuar Ukrainën.

Ajo ka shkaktuar gjithashtu zemërimin e shefit të NATO-s Jens Stoltenberg, i cili përshkroi vendosjen si “të pajustifikuar, të pashpjegueshme dhe thellësisht shqetësuese”.

Por, Shoigu u shpreh se stërvitja ruse u provokua nga ato që ai tha se ishin përpjekjet e Shteteve të Bashkuara dhe aleatëve të tyre të NATO-s për të forcuar forcat e tyre pranë kufijve të Rusisë, “duke kërcënuar” kështu Rusinë.

“Trupat kanë treguar gatishmërinë e tyre të plotë për të përmbushur detyrat për të siguruar sigurinë e vendit,” tha ai.

Separatistët e Rusisë dhe forcat ukrainase janë të bllokuara në një konflikt në Ukrainën lindore që nga aneksimi i Krimesë nga Moska në vitin 2014.

Gjithashtu të martën, Shtëpia e Bardhë tha se Presidenti i SHBA Joe Biden, gjatë një telefonate me Presidentin rus Vladimir Putin, kishte shprehur shqetësim dhe “i bëri thirrje Rusisë për të de-përshkallëzuar tensionet”.

Si Sekretari i Shtetit i SHBA Antony Blinken dhe Sekretari i Përgjithshëm i NATO-s Jens Stoltenberg ishin në Bruksel të martën për bisedimet e NATO-s.

Në diskutime të ndara me ministrin e jashtëm të Ukrainës, të dy shprehën mbështetje të fortë për Ukrainën.

“Rusia ka zhvendosur mijëra trupa luftarake në kufijtë e Ukrainës, masa më e madhe e trupave ruse që nga aneksimi i paligjshëm i Krimesë në 2014”, tha Stoltenberg gjatë një konference për shtyp.

“Gjatë ditëve të fundit, disa ushtarë ukrainas janë vrarë në Ukrainën lindore”, u shpreh ai.

“Rusia duhet të përfundojë këtë grumbullim ushtarak në dhe përreth Ukrainës, të ndalojë provokimet e saj”, shtoi ai.

Mes tensioneve të fundit, SHBA ka njoftuar gjithashtu Turqinë se dy anije luftarake të SHBA-së do të lundrojnë në Detin e Zi në 14 prill dhe 15 prill dhe do të qëndrojnë atje deri në 4 maj dhe 5 maj.

Anijet e Marinës Amerikane kanë bërë vizita të rregullta në Detin e Zi në vitet e kaluara, por kanë shqetësuar Moskën.

Zëvendës ministri i Jashtëm rus, Sergei Ryabkov denoncoi vendosjen e fundit si  “provokuese”, duke shtuar se “anijet amerikane nuk kanë asgjë për të bërë pranë brigjeve tona”.

Lexoni gjithashtu:

Tensionet Ukrainë-Rusi, Çuçka: Ukraina ka probleme të brendshme, jo me Rusinë

Tensioni Rusi-Ukrainë, Merkel i kërkon Putinit të zvogëlojë praninë e trupave