Selami Xhepa: Borxhi publik i Shqipërisë arrin në 10 miliardë euro

Shqipëria mund të marrë borxh në tregjet ndërkombëtare rreth 500 milionë euro brenda këtij viti. Ky do të jetë eurobondi i pestë dhe prej vitit 2010, qeveria ka marrë rreth 2.4 miliardë euro hua.

Gjatë një interviste për Euronews Albania, Selami Xhepa thotë se marrja e huasë është e parashikuar në buxhetin e vitit 2021, që sipas tij ishte mjaft euforik. Një pjesë e këtyre parave do të shkojë për të shlyer borxhin e maturuar dhe një pjesë tjetër për nevoja të tjera.

“Është Parlamenti që cakton tavanin e borxhit publik dhe qeveria menaxhon brenda këtyre kufijve. Sot Shqipëria ka një borxh publik prej 10 miliardë euro dhe gati gjysma e këtij borxhi është në monedhë të huaj, borxh i jashtëm”, u shpreh z. Xhepa.

Eksperti për ekonominë thekson se interesi nga eurobondi mund të jetë i ulët, por borxhi i jashtëm paraqet disa rreziqe shtesë në krahasim me borxhin publik vendas.

“Kostoja e borxhit mund të ndryshojë në të ardhmen, pavarësisht se norma e interesit sot është e ulët, por presionet e inflacionit nuk do të vonojnë, ndoshta duke filluar që nga viti i ardhshëm. Borxhi i brendshëm pavarësisht se mund të ketë një kosto më të lartë, paraja mbetet po brenda vendit pasi është sistemi financiar i brendshëm që e financon”, tha z. Xhepa.

Ai shtoi se qeveria paguan rreth 500 milionë euro çdo vit, vetëm për shlyerjen e borxhit publik dhe sipas tij Shqipëria ka “arritur në kufijtë ku nga pikëpamja strukturore, borxhi publik do të ishte më mirë që të ishte në monedhën vendase”.

LEXONI GJITHASHTU:

Qeveria kërkon 500 mln euro borxh, financat përgatiten për eurobondin e pestë

Shqipëria e fundit në Europë për konsumin dhe të ardhurat për frymë, thotë Eurostat

Eurobondi 650 mln euro, Dorian Teliti: Qeveria dështoi, paratë s’do shpenzohen për qytetarët