Senatori amerikan: Trump i ka dhënë dritën jeshile projektligjit për sanksione ndaj Rusisë

Presidenti i SHBA-së, Donald Trump, do të lejojë që një projektligj dypartiak për sanksione, i cili synon vendet që bëjnë biznes me Rusinë, të ecë përpara në Kongres dhe ai mund të hidhet në votim që javën e ardhshme, tha të mërkurën senatori republikan Lindsey Graham.

Graham tha në një deklaratë se Trump e kishte “dhënë dritën jeshile” për legjislacionin pasi të dy u takuan të mërkurën. Projektligji, për të cilin Graham ka punuar prej muajsh së bashku me republikanë dhe demokratë të tjerë, do të vendoste sanksione ndaj vendeve që bëjnë biznes me Rusinë, përfshirë blerësit e eksporteve të saj të energjisë, për shkak të dështimit të Moskës për të negociuar një marrëveshje paqeje me Ukrainën. Rusia e pushtoi Ukrainën në vitin 2022.

“Ky projektligj do t’i lejojë Presidentit Trump të ndëshkojë ato vende që blejnë naftë të lirë ruse duke furnizuar me energji makinën e luftës së Putinit”, tha Graham, duke përmendur Kinën, Indinë dhe Brazilin si objektiva të mundshme të legjislacionit.

Graham, një senator nga Karolina e Jugut, tha se mezi pret një “votim të fortë dypartiak” për legjislacionin që do të zhvillohet që javën e ardhshme.

Udhëheqësit në Senat dhe Dhomën e Përfaqësuesve kanë shtyrë votimin e legjislacionit, pasi Trump ka preferuar të vendosë tarifa për mallrat e importuara nga India, blerësi i dytë kryesor në botë i naftës ruse pas Kinës.

Bisedimet që synojnë t’i japin fund luftës pothuajse katërvjeçare në Ukrainë janë përshpejtuar që nga nëntori. SHBA-të mbështetën të martën një koalicion të gjerë të aleatëve të Ukrainës, duke u zotuar të ofrojnë garanci sigurie që, sipas udhëheqësve, do të përfshijnë angazhime të detyrueshme për të mbështetur vendin nëse Rusia sulmon përsëri.

Megjithatë, Moska ende nuk ka sinjalizuar gatishmëri për të bërë lëshime pasi Kievi kërkoi ndryshime në një propozim të SHBA-së që fillimisht mbështeste kërkesat kryesore të Rusisë. Moska gjithashtu nuk ka dhënë asnjë shenjë publike se do të pranonte një marrëveshje paqeje me garancitë e sigurisë të parashikuara nga aleatët e Ukrainës.