Shanse për Julian Assange, SHBA po shqyrtojnë zbutjen e akuzave

Departamenti amerikan i Drejtësisë po mendon t’i ofrojë Julian Assange mundësinë që të deklarohet fajtor për akuzën më pak të rëndë të “keqmenaxhimit të informacioneve të rezervuara”, duke afruar shansin për një akord që mund të çojë në lirimin e tij nga burgu britanik.

Lajmin e bën të ditur “Wall Street Journal”, që citon persona në dijeni të fakteve.

Assange, themelues i portalit “Wikileaks”, po zhvillon një betejë të gjatë ligjore me qeverinë e Britanisë së Madhe për të shmangur ekstradimin në Shtetet e Bashkuara.

Atje ai rrezikon të përballet me një proces për publikimin e mijëra dokumenteve ushtarake të rezervuara dhe kabllograme diplomatike amerikane në vitet 2010.

Aktualisht, një gjykatë e Londrës po vlerëson nëse t’i lejojë 52-vjecarit një apel të fundit kundër ekstradimit.

Pasi prokurorët amerikanë e akuzuan në 2019-n, forcat britanike të policisë e arrestuan dhe që prej atëherë Assange ndodhet në një burg të Londrës.