SHBA dënon me 45 vite burg bosin kolumbian të drogës, më i rëndësishmi pas Escobarit

Një gjykatë amerikane ka dënuar me 45 vite burg, Dairo Antonio Úsuga, i cili dikur ishte bosi më i kërkuar i drogës në Kolumbi.

Úsuga, i njohur ndryshe si Otoniel, ishte një trafikant famëkeq kokaine, i cili udhëhoqi një nga bandat më të fuqishme të Kolumbisë për 9-vite.

Ai u deklarua fajtor për kontrabandë droge dhe për drejtimin e një organizate kriminale.

Gjatë dënimit të tij të martën, Úsuga tha se i vinte keq për veprimet e tij.

“I kërkoj falje qeverive të Shteteve të Bashkuara dhe Kolumbisë dhe viktimave të krimeve që kam kryer”, tha 51-vjeçari.

Prokurorët e kishin përshkruar atë si “trafikantin më të rëndësishëm kolumbian të narkotikëve që nga udhëheqësi i kartelit Medellín, Pablo Escobar”. Sipas të dhënave të SHBA-ve Otoniel mundi të dërgonte rreth 100,000 kilogramë kokainë në tokën amerikane.

Usuga cilësohet gjithashtu si një nga kriminelët më të dhunshëm të dekadave të fundit.

Ai u arrestua në vitin 2021 dhe u ekstradua vitin e kaluar në SHBA për t’u përballur me akuzat e trafikut të drogës.

Avokatët e tij kërkuan një dënim jo më shumë se 25 vite. Ata argumentuan se edukimi i tij në varfërinë rurale, i rrethuar nga lufta guerile, e çoi atë drejt një jete si kriminel.

Por gjyqtarja Dora Irizarry, i hodhi poshtë këto argumente, duke thënë se rritja e saj në një kompleks banesash në Bronxin e Jugut, rreth drogës dhe dhunës, nuk e çoi atë në një rrugë të ngjashme.

Úsuga ka dorëzuar 216 milion dollarë (170 milion £) të ardhura nga droga si pjesë e pranimit të tij të fajësisë.

Ai ishte lideri i kartelit “Klani i Gulfit” në Kolumbi, i cili është një nga bandat më të fuqishme dhe brutale të vendit.

Banda, e cila vepron në shumë provinca dhe ka lidhje të gjera ndërkombëtare, është e angazhuar në kontrabandën e drogës, qenieve njerëzore, nxjerrjen e paligjshme të arit dhe zhvatjen.

Ky klan kontrollon shumë nga rrugët e përdorura për kontrabandën e drogës nga Kolumbia në SHBA, madje dhe deri në Rusi.

LEXONI GJITHASHTU:

• Hera e dytë që aksidentohet në detyrë, kush është efektivja që u përplas në Vorë
• Rreh dhe dhunon punonjësit që do t’i masnin sahatin e ujit, arrestohet i riu
• U kap duke kryer punime pa leje, procedohet penalisht 82-vjeçari