SHBA dënon stërvitjen ushtarake të Kinës rreth Tajvanit

Shtëpia e Bardhë dënoi “sulmet me raketa precize” të Kinës të cilat gjatë ditës së enjte preken ujërat jashtë brigjeve të Tajvanit.

Pekini i kreu sulmet si pjesë e stërvitjeve ushtarake që kanë ngritur tensionet në rajon në nivelin më të lartë në dekada. Aksioni erdhi pas një vizite në Tajvan të kryetares së Dhomës së Përfaqësuesve të SHBA, Nancy Pelosi.

“Kina ka zgjedhur të reagojë dhe të përdorë vizitën e Kryetares si një pretekst për të rritur aktivitetin provokues ushtarak rreth ngushticës së Tajvanit. Ne nuk do të kërkojmë, e as nuk duam një krizë. Në të njëjtën kohë, nuk do të pengohemi nga operimi në dete dhe qiejt në përputhje me ligjin ndërkombëtar, siç kemi bërë për dekada, duke mbështetur Tajvanin dhe duke mbrojtur një rajon  të lirë dhe të hapur”, u shpreh zëdhënës i Këshillit të Sigurisë Kombëtare të SHBA, John Kirby.

Kirby shtoi se Sekretari amerikan Mbrojtjes, Lloyd Austin ka urdhëruar anijen  Ronald Reagan dhe anije të tjera që të qëndrojnë në stacion “për të monitoruar situatën”.

Ai gjithashtu njoftoi se një test i planifikuar për këtë javë është vendosur që të zhvillohet pavarësisht tensioneve.

Kryetarja e Dhomës së Përfaqësuesve të SHBA Nancy Pelosi është shprehur  se Kina nuk do të izolojë Tajvanin duke penguar zyrtarët amerikanë të udhëtojnë në ishull.

Ajo i bëri komentet në Tokio, pjesa e fundit e turneut të saj në Azi, ku u takua me kryeministrin japonez Fumio Kishida.

LEXONI GJITHASHTU

• Kina lëshon raketa afër Tajvanit pas vizitës së Pelosit
• Përplasjet Kinë-Tajvan, si nisën tensionet mes ishullit të vetëqeverisur dhe Pekinit