SHBA dhe Irani drejt bisedimeve bërthamore, Trump: Khamenei duhet të jetë shumë i shqetësuar

Shtetet e Bashkuara dhe Irani kanë rënë dakord të zhvillojnë bisedime bërthamore në Oman të premten, në një moment tensioni të lartë diplomatik dhe ushtarak. Takimi do të mbahet në Muscat dhe do të nisë në orën 10:00 lokale (06:00 GMT), konfirmoi ministri i Jashtëm iranian, Abbas Araghchi, ndërsa zyrtarët amerikanë konfirmuan gjithashtu vendndodhjen.

Arritja e marrëveshjes për zhvillimin e bisedimeve erdhi pasi ato dukeshin në rrezik, për shkak të mosmarrëveshjeve mes dy palëve lidhur me vendin dhe parametrat e dialogut.

Presidenti amerikan Donald Trump ka shtuar praninë ushtarake të SHBA-ve në rajon dhe ka kërcënuar me veprime ushtarake nëse Irani nuk pranon një marrëveshje për programin e tij bërthamor dhe nuk ndalon shtypjen e protestave. I pyetur nga NBC News nëse Udhëheqësi Suprem iranian, Ajatollah Ali Khamenei, duhet të shqetësohet, Trump u shpreh: “Do të thoja se ai duhet të jetë shumë i shqetësuar… siç e dini, ata po negociojnë me ne.”

Nga ana tjetër, Khamenei paralajmëroi të dielën se çdo sulm amerikan ndaj Iranit do të çonte në një “luftë rajonale”, duke rritur më tej shqetësimet për stabilitetin në Lindjen e Mesme.