SHBA, Gjykata e Lartë vendos pro LGBTI: Nuk mund të pushohen nga puna prej orientimit seksual

Gjykata e Lartë e Shteteve të Bashkuara ka deklaruar se punonjësit LGBTI nuk mund të pushohen nga puna për shkak të orientimit të tyre seksual, një vendim historik i marrë gjatë ditës së hënë.

Vendimi në favor të komunitetit LBGTI vjen pavarësisht emërimit nga presidenti Donald Trump të dy gjykatësve konservatorë.

Me 6 vota pro dhe 3 kundër, gjykata vendosi që dispozita e njohur si “Titulli VII”, e cila ndalon diskriminimin me bazë gjinore, përfshin edhe diskriminimin kundër punonjësve LGBTI.

Vetëm fillimi

Pretendenti kryesor i Demokratëve Joe Biden e ka cilësuar vendimin si “një hap më tej në marshimin drejt barazisë për të gjithë”.

“Gjykata e Lartë ka afirmuar idenë e thjeshtë por thellësisht amerikane se çdo qenie njerëzore duhet të trajtohet me respekt”, tha ai. 

Today’s decision is another step in our march toward equality for all. The Supreme Court has confirmed the simple but profoundly American idea that every human being should be treated with respect. But we’re not done. https://t.co/Bz4SMA9tgb

— Joe Biden (@JoeBiden) June 15, 2020

Vendimi i Gjykatës është mirëpritur gjithashtu nga një sërë organizatash për të drejtat LGBTI.

Çështje që “i takon Kongresit, jo Gjykatës”

Gjykatësi Brett Kavanaugh, një prej të emëruarve nga presidenti Trump, ishte një ndër ata që votuan kundër këtij vendimi.

Sipas tij, gjykata në këtë mënyrë po “rishkruan ligjin” duke i dhënë një tjetër kuptim termit seks në mënyrë që  të përfshijë dhe identitetin gjinor dhe orientimin seksual dhe se “përgjegjësia për të ndryshuar të ashtu-quajturin ‘Titulli VII’ i përket Kongresit dhe presidentit, jo Gjykatës”, u shpreh ai.

Megjithatë ai shtoi se “është e rëndësishme që të njihet fitorja e rëndësishme e arritur për komunitetin LGBTI në Amerikë”.