SHBA konfiskon mbi 300 dronë gjatë Kupës së Botës, shkelën hapësirën ajrore të kufizuar

Autoritetet amerikane kanë konfiskuar më shumë se 300 dronë që nga fillimi i ndeshjeve të Kupës së Botës FIFA 2026, për shkak të shkeljes së rregullave të hapësirës ajrore të kufizuar, njoftoi Administrata e Sigurisë së Transportit (TSA).

Në një deklaratë të publikuar në rrjetin social X, TSA tha se “Marshallët Federalë të Ajrit, në bashkëpunim me partnerë shtetërorë dhe federalë, kanë sekuestruar mbi 300 dronë gjatë ngjarjeve të Kupës së Botës deri më tani”.

Autoritetet theksuan se fluturimi i dronëve në zona të ndaluara përbën krim federal dhe mund të sjellë pasoja të rënda, përfshirë burgim, konfiskim të pajisjes dhe gjoba deri në 100,000 dollarë.

Administrata Federale e Aviacionit (FAA) ka vendosur “zona pa dronë” rreth të gjitha stadiumeve, zonave të tifozëve dhe kampeve bazë të ekipeve, me qëllim garantimin e sigurisë së pjesëmarrësve dhe spektatorëve.

Gjatë ditëve të ndeshjeve, ndalohet çdo fluturim i paautorizuar brenda një rrezeje prej 3 miljesh detare (5.5 km) dhe deri në 3,000 këmbë (914 m) lartësi rreth stadiumeve. Kufizime shtesë vlejnë edhe për zonat e tifozëve, ku ndalohet fluturimi brenda 1 milje detare dhe deri në 1,000 këmbë (305 m) lartësi.