SHBA regjistron rekord, 3 mijë viktima në një ditë nga COVID-19

Shtetet e Bashkuara regjistruan një shifër prej 3 mijë të vdekurish ditën e mërkurë, që përbën një shifër rekord sa i takon të vdekurve në një ditë të vetme nga COVID-19.

Lajmin e ka bërë të ditur Universiteti Johns Hopkins, që ka shtuar se në të njëjtin hark kohor u regjistruan edhe mbi 220 mijë raste të reja infektimesh.

Rritja më e madhe e infektimeve u regjistrua në shtetin e Kalifornisë, me mbi 30 mijë raste. Funksionarët amerikanë të Shëndetësisë e prisnin një rritje të tillë, pasi miliona amerikanë udhëtuan dy javë më parë për festën e Falënderimit, pavarësisht thirrjeve për të qëndruar në shtëpitë e tyre.

Në total Shtetet e Bashkuara numërojnë mbi 15.37 milionë persona të infektuar dhe mbi 289 mijë vdekje.