SHBA sanksionojnë Rusinë për sulmet kibernetike, Uashingtoni dëbon 10 diplomatë rusë

Shtetet e Bashkuara njoftuan të enjten një seri sanksionesh të reja ndaj Rusisë, si përgjigje ndaj sulmeve kibernetike.

Masat ndëshkuese, të përfshira në një urdhër ekzekutiv të firmosur nga presidenti Joe Biden, synojnë të dobësojnë aktivitetet dashakeqe të Rusisë, thuhet në një komunikatë të Shtëpisë së Bardhë.

Lëvizja e administratës amerikane vë në shënjestër 32 subjekte ruse dhe përfshin 10 diplomatë rusë, të cilët do të dëbohen nga Shtetet e Bashkuara.

Uashingtoni akuzon Moskën për aktivitet kibernetik dashakeq dhe për ndërhyrje në zgjedhjet presidenciale të 2020-s.

Urdhri ekzekutiv gjithashtu ndalon institucionet financiare amerikane të blejnë bonde në valutën ruse, duke filluar nga qershori.

Sanksionet vijnë në një moment tensionesh në marrëdhëniet mes Shteteve të Bashkuara dhe Rusisë. Kjo e fundit ka reaguar duke i cilësuar masat si “të paligjshme” dhe duke paralajmëruar me kundërpërgjigje.

“Ne e kemi paralajmëruar disa herë Uashingtonin për pasojat e veprimeve armiqësore të tij, të cilat rrisin nivelin e rrezikut të përballjes mes vendeve tona. Ky drejtim, sikurse e kemi thënë më parë, nuk përkon me interesat e kombeve të dy vendeve lider në fushën bërthamore, që janë historikisht përgjegjëse për fatet e botës”, u shpreh Maria Zakharova, zëdhënëse e Ministrisë së Jashtme ruse.

Kremlini shtoi gjithashtu se sanksionet do të reduktojnë shanset për një takim mes presidentëve Biden dhe Putin, i kërkuar nga vetë kreu i shtetit amerikan, për të diskutuar mbi krizën në Ukrainë.