SHBA sanksionon politikanin dhe dhëndrin e presidentit libanez për korrupsion

Administrata amerikane ka sanksionuar një prej eksponentëve kryesorë të politikës libaneze, nën akuzën e korrupsionit. Bëhet fjalë për dhëndrin e presidentit të vendit, të cilin Uashingtoni e mban përgjegjës për afere korruptive që kanë cenuar funksionimin e qeverisë vendase.

Lajmin e ka konfirmuar vetë Departamenti amerikan i Thesarit, që ka vënë në shënjestër politikanin Gebran Bassil, njëkohësisht dhëndri i presidentit të vendit të Lindjes së Mesme, Michel Aoun.

Në muajt e fundit Uashingtoni ka vendosur sanksione ndaj një sërë zyrtarësh libanezë të lidhur me lëvizjen Hezbollah, milicia Shiite e mbështetur nga Irani, që është kthyer në një fuqi serioze në rajon.

Vetë Bassil ka reaguar përmes një postimi në rrjetin social Twitter, duke thënë se sanksionet nuk e trembin.

Sidoqoftë, Departamenti i Thesarit e konsideron atë “kokën e korrupsionit” në Liban.

Në një deklaratë, sekretari i Thesarit, Steven Mnuchin nënvizoi se, korrupsioni sistematik në sistemin politik libanez ka gërryer themelet e një qeverisjeje efikase, që i shërben popullit.

Bassil udhëheq Lëvizjen e Lirë Patriotike, blloku politik i krishterë më i madh në Liban, i themeluar nga presidenti i vendit.

Lexoni gjithashtu

• Shpërthimi në Bejrut, FBI përfshihet në hetime
• Bejrut, qytetarët kërkojnë largimin e qeverisë pas shpërthimit
• Bashkimi Evropian u vendos sanksione zyrtarëve rus për helmimin e Navalny