Shefi i inteligjencës së Finlandës: Hyrja e dronëve në hapësirën ajrore, një kërcënim në rritje

Rreziku i dronëve që lëvizin drejt Finlandës si pasojë e luftës së vazhdueshme në Ukrainë është në rritje, tha për agjencinë e lajmeve AFP kreu i shërbimit të inteligjencës ushtarake të vendit.

Gjeneralmajor Pekka Turunen, shefi i Inteligjencës së Mbrojtjes Finlandeze (FDI), foli përpara publikimit të një raporti të inteligjencës ushtarake finlandeze të enjten, i cili përditëson situatën e sigurisë në vend që ndan një kufi prej 1,340 kilometrash me Rusinë.

Një shqetësim i theksuar në raport ishte rreziku i dronëve me rreze të gjatë veprimi që lëviznin drejt Finlandës.

“Rreziku i një droni që hyn në hapësirën ajrore finlandeze ose në territorin finlandez po rritet gjithë kohës, sa më shumë që Ukraina sulmon në këtë zonë pranë Gjirit të Finlandës. Ukraina i ka vënë në shënjestër këto porte nafte, mjaft afër Finlandës dhe tani e dimë se si Rusia po i kundërshton ato duke përdorur bllokimin e GPS-it, kështu që nëse një dron po përdor GPS për navigim për të arritur objektivin e tij, ai mund të devijohej diku tjetër përmes këtij bllokimi”, tha Turunen.

Situata e sigurisë në Finlandë është përkeqësuar që nga fillimi i pushtimit të plotë të Ukrainës nga Rusia në vitin 2022, por agjencia e inteligjencës vuri në dukje se situata kishte mbetur kryesisht e pandryshuar krahasuar me një vit më parë.

Pas pushtimit të Ukrainës, vendi nordik i dha fund dekadave të mosangazhimit ushtarak dhe aplikoi për t’u bashkuar me NATO-n, duke u bërë anëtare në prill 2023.