Shembja e ndërtesës në Majemi, 5 të vdekur dhe 156 të humbur

Ndërsa bilanci i viktimave u rrit në 5 persona, anëtarë të komunitetit të Sërfsajd, në Majemi të Floridës u mblodhën pranë godinës së shembur, nën rrënojat e të cilës llogaritet se ndodhen rreth 150 persona.

Grupi i banorëve bëri homazhe në një memorial të improvizuar duke vendosur lule, fotografi të personave të humbur dhe shënime për të dashurit e tyre.

Miq dhe familjarë u përqafuan me njëri-tjetrin dhe u lutën që personat e konsideruar të humbur të gjenden të gjallë.

Ndërkohë, ekipet e shpëtimit po vijojnë kërkimet.

Të ndihmuar nga qentë e stërvitur, rreze skanimi infra të kuqe dhe pajisje të tjera, ata shpresojnë se xhepat e ajrit të formuara nën rrënoja mund t’i mbajnë gjallë personat e bllokuar.

Por, operacionet po hasin vështirësi për shkak të një zjarri, origjina e të cilit është thellë në pjesët e shembura të godinës dhe i vështirë për t’u arritur.

Ndërtesa kishte mbi 130 apartamente, 80 prej të cilave ishin të banuara.

Një raport i publikuar në vitin 2018 mbi gjendjen e saj, fliste për një dëm të madh në strukturë, të konstatuar nga inxhinierët dhe përkeqësim të gjendjes së çimentos në garazhin nëntokësor të saj.

LEXONI GJITHASHTU:

• Vijojnë kërkimet në pallatin e shembur në Florida, 159 persona rezultojnë ende të zhdukur
• Shtohet frika nga varianti ‘Delta’, pritet të jetë dominues gjatë gushtit
• Shembet ndërtesa 12-katëshe në Florida, një i vdekur dhe 50 të humbur