Shifra rekord në SHBA, numri i të infektuarve po shkon në 14 milionë, izolohen qytetarët në Los Angeles

Infektime dhe shtrime rekord në spitale janë raportuar në 24 orët e fundit në Shtetet e Bashkuara, me frikën se trendi nuk do të ulet as gjatë periudhës së festave.

Numri i personave të shtruar në spitale kaloi për herë të parë kuotën e 100 mijë rasteve, një shifër kjo që është dyfishuar që nga fillimi i nëntorit.

Rastet e reja u rritën me një shifër rekord prej 195 mijë e 695 njësi, ndërsa vdekjet ishin 2 mijë e 733, shumë pranë një rekordi të ri.

Qyteti i Los Angeles ka reaguar ndaj rritjes së paprecedentë duke urdhëruar banorët që të qëndrojnë në shtëpitë e tyre.

Ndërkohë, Kalifornia, Teksasi dhe Florida, tre shtetet më të populluara të Amerikës, janë mes zonave më të prekura dhe kanë regjistruar secili mbi 1 milion raste.

Në nivel kombëtar, infeksionet po i afrohen shifrës 14 milionë, me mbi 264 mijë vdekje, sipas të dhënave zyrtare.

Shifrat kanë vazhduar të rriten në javët e fundit, me thuajse 1 milion raste infektimi të raportuara çdo javë në nëntor, e barazvlefshme me 99 raste në minutë.

Përballë kësaj situate, autoritetet amerikane kanë paralajmëruar se sistemi shëndetësor i vendit po përballet me një ngarkesë të rëndë këtë dimër.