Shkëmbime të reja midis Rusisë dhe Ukrainës, lirohen 200 të burgosur nga të dyja vendet

Rusia dhe Ukraina shkëmbyen 200 të burgosur lufte nga secila palë këtë të enjte dhe do të shkëmbejnë 300 të tjerë nesër, tha Moska, pas një marrëveshjeje të arritur në negociatat e fundit në Gjenevë.

Të dyja palët shkëmbejnë periodikisht të burgosurit e luftës dhe kthejnë trupat e ushtarëve, masa më e fundit ndodhi javën e kaluar, pavarësisht mungesës së përparimit drejt një marrëveshjeje paqeje për t’i dhënë fund luftës katërvjeçare.

“Brenda kuadrit të marrëveshjeve të arritura në Gjenevë, një shkëmbim i të burgosurve me Ukrainën do të zhvillohet më 5 dhe 6 mars, 500 për 500 ”, shkroi në Telegram negociatori rus dhe këshilltari i Kremlinit, Vladimir Medinsky.

Pak më parë, Ministria ruse e Mbrojtjes njoftoi se 200 të burgosur lufte rusë u shkëmbyen sot me të njëjtin numër ushtarësh ukrainas që mbaheshin nga Moska.

Në deklaratë, ministria ruse tha se raundi i dytë i shkëmbimit që përfshin 300 të burgosur nga secila palë do të zhvillohet nesër. Sipas të njëjtit burim, shkëmbimi është rezultat i “një procesi kompleks negociues” të ndërmjetësuar nga Emiratet e Bashkuara Arabe dhe Shtetet e Bashkuara.