Shpërthen kolera në perëndim të Sudanit, 30 persona humbin jetën, 800 të tjerë të infektuar

Të paktën 30 persona kanë humbur jetën dhe rreth 800 të tjerë janë infektuar nga një shpërthim i kolerës në shtetin e Kordofanit Perëndimor, në perëndim të Sudanit, që nga 20 qershori, njoftoi një grup humanitar sudanez.

Sipas Dhomës së Emergjencës Dar Hamar, rastet janë regjistruar në lokalitetet Wad Banda dhe Al-Nahud, si edhe në më shumë se 25 fshatra përreth. Organizata u bëri thirrje autoriteteve shëndetësore dhe organizatave humanitare të ndërhyjnë urgjentisht për të siguruar ilaçe, lëngje intravenoze dhe furnizime të tjera mjekësore për të frenuar përhapjen e epidemisë.

Ndërkohë, Ministria e Shëndetësisë e Sudanit kishte njoftuar të martën se në shtetet e Kordofanit Perëndimor dhe Verior janë regjistruar gjithsej 911 raste me kolerë, përfshirë 127 viktima.

Sudani vazhdon të përballet me një krizë të rëndë humanitare që nga shpërthimi i luftës në prill të vitit 2023 mes ushtrisë dhe Forcave të Mbështetjes së Shpejtë (RSF). Konflikti ka shkaktuar dhjetëra mijëra viktima dhe ka detyruar afro 13 milionë njerëz të largohen nga shtëpitë e tyre, duke rënduar më tej situatën shëndetësore në vend.