Mbi 10 të plagosur, 5 të humbur pas shpërthimit në parkun industrial në Gjermani

16 persona janë plagosur dhe 5 nuk dihet ku janë pas shpërthimit në një qendër përpunimi mbeturinash të industrisë së kimikateve në qytetin Leverkusen të Gjermanisë.

Disa prej të lënduarve janë në gjendje kritike, konfirmoi bashkia.

Shpërthimi ndodhi rreth orës 9:30 të mëngjesit në një incinerator në Leverkusen, qytet në landin Rini Veriut-Vestfalia.

Bashkia tha se një rezervuar lëndësh tretëse kishte marrë flakë disa orë pas shpërthimet , por duhej shkëputur një kabllo elektriciteti përpara se të ndërhynin për të shuar zjarrin.

“Situata në Leverkusen është ende e turbullt për momentin. Jemi në vendngjarje për të sqaruar rrethanat”, njoftoi policia.

Agjencia e mbrojtjes civile të qeverisë gjermane ka paralajmëruar për “rrezik ekstrem”.

#Leverkusen #Explosion #Müllverbrennungsanlage der Bayer AG brennt! Fenster und Türen schließen! https://t.co/a0hLqiLWvs pic.twitter.com/v5FXqBCmd0

— Schockfünf (@FohlenJens) July 27, 2021

Shpërthimi ka ndodhur në pjesën ku përpunohen mbeturinat, deklaroi kompania që operon incineratorin ‘Currenta’.

Chempark, një prej parqeve kimike më të mëdha në Europë, shkroi në Twitter se nuk është ende e ditur se çfarë e shkaktoi shpërthimin.

“Banorët duhet të qëndrojnë në shtëpi dhe të mbajnë dyert e dritaret të mbyllura”, shkruan Chempark.

Media lokale WDR ka cituar dëshmitarët që tregojnë se në fillim dëgjuan një shpërthim të fuqishëm e më pas panë shtëllunga tymi që vinin nga fabrika e prodhimeve kimike Bayer, një prej kompanive më të mëdha kimike gjermane.

Autoritetet kanë mbyllur disa prej autostradave.