‘Shtet terrorist’, Zelenski kërkon dëbimin e Rusisë nga Kombet e Bashkuara

Presidenti i Ukrainës, Volodimir Zelenski akuzoi Rusinë se u bë një shtet “terrorist” që kryen “akte terroriste të përditshme” dhe kërkoi dëbimin e Rusisë nga Kombet e Bashkuara.

Këtë deklaratë Zelenksi e bëri gjatë një fjalimi në Këshillin e Sigurimit të OKB-së të martën.

Zelenski i kërkoi OKB-së të krijojë një gjykatë ndërkombëtare për të hetuar “veprimet e pushtuesve rusë në tokën ukrainase”.

“Ne duhet të veprojmë urgjentisht për të bërë gjithçka për ta bërë Rusinë të ndalojë vrasjet,” u shpreh presidenti i Ukrainës, duke paralajmëruar se përndryshe “aktiviteti terrorist” i Rusisë do të përhapet në vendet e tjera evropiane dhe Azi, duke veçuar shtetet baltike, Poloninë, Moldavinë dhe Kazakistanin.

“Ata punojnë si terroristë çdo ditë”, u shpreh ai më tej.

Megjithatë, një lëvizje e tillë është praktikisht e pamundur, pasi Rusia do të ishte në gjendje të përdorte veton e saj si një anëtare e përhershme e këshillit për të bllokuar çdo përpjekje për ta rrëzuar atë.

Ukraina thirri mbledhjen e këshillit pas rritjes së fundit të sulmeve të Rusisë, përfshirë sulmin ajror të së hënës në një qendër tregtare të mbushur me njerëz në qytetin qendror të Kremenchuk.

LEXONI GJITHASHTU:

• Rusia shton Zonjën e Parë të SHBA në ‘listën e zezë’
• Kancelari Scholz: Rusia nuk duhet ta fitojë luftën në Ukrainë