Përhapja e variantit të ri të COVID-19, Britania shtrëngon masat për Krishtlindje

Kryeministri britanik Boris Johnson deklaroi këtë të shtunë se plani për të lehtësuar kufizimet e COVID-19 gjatë Krishtlindjeve nuk do të zbatohet për shkak të një rritje të numrit të të infektuarve me një variant të ri të virusit vdekjeprurës.

“Me keqardhje të madhe më duhet t’ju lajmëroj që nuk mund të vazhdojmë me festimin e Krishtlindjeve siç e kishim planifikuar. Si kryeministër i vendit është detyra ime të marr vendime të vështira dhe të bëj çka është e duhur për të mbrojtur shtetasit e këtij vendi. Nuk do të ketë lehtësim masash deri në janar kështu që është shumë e rëndësishme që njerëzit të respektojnë rregullat”, tha kryeministri Johnson.

Londra dhe Juglindja e Anglisë, që përbëjnë një të tretën e popullsisë së vendit, ndodhen aktualisht në nivelin e 3-të të rrezikshmërisë dhe kufizimeve nga COVID-19, dhe tashme do të vendosen në nivelin e 4-t.

Njerëzve do t’u kërkohet të qëndrojnë në shtëpi, përveç rasteve të nevojshme si, vajtja në punë, teksa të gjitha dyqanet e utiliteteve jothelbësore do të mbyllen, sikurse edhe baret restorantet dhe aktivitetet të tjera në ambiente të mbyllura.

Ditën e premte Johnson deklaroi se shpresonte që Anglia nuk do të kishte nevojë për një izolim të tretë pas Krishtlindjeve dhe se do të ishte “çnjerëzore” që të mos lejohej festimi I Krishtlindjeve.

Banorët që jetojnë në zonat ku është vendosur niveli i 4-t i rrezikshmërisë nuk do të lejohet të udhëtojnë gjatë Krishtlindjeve, ndërsa në zona të tjera të vendit, njerëzit do të lejohen të udhëtojnë për t’u takuar me familjen dhe miqtë vetëm për një ditë. Rregullat e reja do të hyjnë në fuqi nga e shtuna në mbrëmje.