Situata në Evropë, Italia dhe Spanja nisin fazën e dytë të vaksinimit anti-COVID

Presidenti serb Aleksandar Vuçiç vlerësoi maksimalisht Kinën për pajisjen e Serbisë me 1 milion doza vaksinë anti-COVID.

Vuçiç ishte në aeroportin ndërkombëtar të Beogradit për të pritur stokun e parë të vaksinave nga grupi kinez “Sinopharm”.

Në një intervistë për një televizion kinez, kreu i shtetit serb theksoi se 1 milion doza vaksina mund të shpëtojnë shumë jetë.

Spanja filloi të dielën fazën e dytë të vaksinimit me vaksinat Pfizer dhe Bio’n’Tech në shtëpitë e të moshuarve.

Gjithashtu Spanja ka marrë aprovimin edhe për vaksinën Moderna e cila ka filluar të shpërndahet në qendrat shëndetësore në të gjithë vendin.

Synimi i qeverisë spanjolle është që të vaksinojë 70% të popullsisë përpara nisjes së sezonit veror.

Ditën e premte, Spanja raportoi 49 mijë raste të reja me Covid-19, një rekord infektimesh që nga nisja e pandemisë.

“Jemi shumë të lumtur që kemi arritur në këtë faze të vaksinimit dhe jemi mirënjohës dhe shpresojmë që të vaksinohet e gjithë popullsia, pasi sigurisht ne duhet të krijojmë imunitet ndaj virusit. Autoritetet po bëjnë një punë të mirë duke vaksinuar të gjithë rezidentet në shtëpitë e të moshuarve”, tha Roza Vilanova, drejtoreshë e shtëpisë së të moshuarve.

Autoritetet italiane deklaruan se Italia është vendi i parë në Evropë që arrin kuotën e 1 milionë personave të vaksinuar, teksa ditën e dielë ata nisën administrimin e dozës së dytë të vaksinës Pfizer.

Pavarësisht këtij fakti, në të gjithë vendin vazhdojnë të mbeten në fuqi masat kufizuese, teksa nëntë rajone do të zgjasin orarin e aktiviteteve të bareve dhe restoranteve.

Ndërkohë Austria e ka zgjatur periudhën e izolimit deri më 7 shkurt.

“Zonja dhe zotërinj, ne jemi të ndërgjegjshëm se këto masa do të ndikojnë të të gjithë ne, student, prindër dhe sipërmarrës. Por nëse lehtësojmë masat tani, nuk do të kemi arritur asgjë nëse detyrohemi të vendosim masa akoma më strikte pas 10 ditësh kur infektimet të arrijnë shifra dramatike”, tha Sebastian Kurz, kancelari i Austrisë.

Ndërkohë Zvicra, ka vendosur që edhe pjesëtaret e ushtrisë të punojnë nga shtëpitë e tyre, si një masë për të ulur rrezikun e infektimeve.

6000 rekrutë të rinj do të stërvitem nga ambientet e banesave të tyre për 6 orë në ditë.

Lexoni gjithashtu:

Britania ashpërson masat, nga e hëna udhëtaret duhet të dëshmojnë një test negativ

Variant i ri i COVID-19 në Brazil, Mbretëria e Bashkuar ndalon udhëtimet nga Amerika e Jugut dhe Portugalia