S’ka një datë për takimin me Vuçiçin, thotë Kurti

Të premten kryeministri i Kosovës, Albin Kurti deklaroi se nuk ka ndonjë datë të caktuar për takimin me presidentin e Serbisë, Aleksandër Vuçiç në kuadër të dialogut Kosovë-Serbi.

Sa i përket takimeve të përfaqësuesve të delegacioneve ndërmjet dy shteteve në Bruksel, ai tha se i radhës mund të ndodhë në gjysmën e dytë të nëntorit.

Kryeministri Kurti theksoi se bllokimi i boksierëve të Kosovës nga Serbia tregoi fytyrën e thelbin e Serbisë si shtet për ata që kanë pasur dilema.

Reciprociteti me targat ishte një nga çështjet që ngjalli tensione midis Kosovës dhe Serbisë gjatë javëve të fundit.

Për këtë çështje u arrit një marrëveshje me ndërmjetësimin e Brukselit.

Më 21 tetor u mbajt  takimi i parë i grupit punues për targa ndërmjet Kosovës dhe Serbisë.

I dërguari i Posaçëm i Bashkimit Evropian për dialog, Miroslav Lajçak deklaroi se pret që në një periudhë prej gjashtë muajsh të ketë një zgjidhje konkrete për çështjen e targave për automjetet e Kosovës dhe Serbisë.