Sllovenët kundër qeverisë, të vendosur të mbrojnë burimet ujore nga ndërtimet

Përmes një referendumi të zhvilluar një ditë më parë, qytetarët sllovenë refuzuan ndryshimet ligjore të propozuara nga qeveria për ndërtimet buzë detit, liqeneve apo lumenjve.

Grupet e shoqërisë civile që formuan “Lëvizjen për ujë të pijshëm” dhe mblodhën më shumë se 50 mijë nënshkrime për të bërë të detyrueshëm referendumin, thonë se ndryshimet ligjore do të lehtësonin rregullat për ndërtimin në zonat bregdetare dhe buzë liqenit.

Ata kishin frikë se do të ndërtoheshin restorante, hotele, dyqane dhe parkingje që kufizojnë hyrjen e publikut në liqene, lumenj dhe det, rrisin rrezikun e ndotjes së ujit dhe kërcënojnë cilësinë e ujit të pijshëm.

Sipas rezultateve zyrtare rreth 86.6% e votuesve votuan kundër ndryshimeve të miratuara nga qeveria, bazuar në 99.9% të votave të numëruara. Pjesëmarrja në referendum ishte 46%.

Analisti Andraz Zork, u shpreh se refuzimi i ndryshimeve në ligjin mbi burimet ujore “është çështje e mosbesimit popullor ndaj qeverisë”.

Qeveria konservatore e kryeministrit Janez Jansa tha se ndryshimet synojnë të sigurojnë më shumë fonde për mbrojtjen e liqeneve dhe lumenjve, forcimin e mbrojtjes nga përmbytjet dhe forcimin e rregullave të ndërtimit.

Në vitin 2016, Sllovenia ndryshoi kushtetutën e saj për ta bërë qasjen në ujë një të drejtë themelore për të gjithë qytetarët dhe të ndalojë tregtimin e tij.

LEXONI GJITHASHTU:

• Mbjellja e bimëve nën ujë, alternativë ndaj bujqësisë tradicionale
• Mukoza kërcënon detin Marmara, presidenti turk Erdogan zotohet se do të shpëtojë ujërat detarë
• 4 nga plazhet më të bukura në Evropë për të bërë sërf