Sllovenia merr presidencën e Bashkimit Europian

Më 1 korrik Sllovenia merr drejtimin e presidencës së Bashkimit Europian, për herë të dytë në historinë e vendit.

Marrja e drejtimit të unionit për gjashtë muajt e ardhshëm vjen në një moment kyç, kur blloku europian po miraton paketa të rëndësishme në lidhje me klimën, rinovimin digjital dhe forcimin e qëndrueshmërisë së tij.

Për ministrin e Jashtëm slloven, Anze Logar, presidenca është një shans për të përforcuar integrimin brenda BE-së dhe brenda institucioneve të tij, si dhe për të nxitur zhvillimin drejt një komuniteti inovativ dhe kreativ, të bazuar tek zhvillimi i qëndrueshëm.

Konkretisht, presidenca do të bazohet në katër shtylla, të përmbledhura në sloganin “Të bashkuar, qëndrueshmëri, Europë”.

Vetë shteti slloven i ka dhënë prioritet forcimit të strukturës së unionit, rimëkëmbjes ekonomike dhe autonomisë strategjike.

Kështu, një vëmendje e veçantë do t’i kushtohet mekanizmit të rimëkëmbjes dhe Paketës së Gjeneratës së Re të BE-së. Kjo e fundit, e bazuar në tranzicionin e gjelbër dhe atë dighital.

E ardhmja e vendeve të Ballkanit Perëndimor do të jetë gjithashtu në fokus. Për shefin e diplomacisë sllovene, vazhdimi i procesit të zgjerimit duhet të kthehet në interesin strategjik të unionit.

Kjo çështje do të vihet në dukje në samitin mes BE-së dhe Ballkanit Perëndimor, që do të zhvillohet pikërisht në Slloveni, në vjeshtë.

Marrja e presidencës nga Sllovenia vjen pas drejtimit të saj nga Portugalia, gjatë së cilës Shqipëria dhe Maqedonia e Veriut nuk morën dritën e gjelbër për konferencën ndërqeveritare me BE-në, që do t’i çonte dy vendet më pranë hapjes së negociatave të anëtarësimit.

LEXONI GJITHASHTU: 

• Presidenti i Sllovenisë vizitë në Prishtinë: Jemi kundër ndryshimit të kufijve në Ballkan
• Tre ministrat e Jashtëm të Austrisë, Sllovenisë dhe Çekisë zbarkojnë në Tiranë