Sllovenia deklaroi se do të rrëzojë një gardh me gjatësi 200 kilometra në kufirin e saj me Kroacinë, pasi nuk përmbushi qëllimet.

Gardhi u krijua gjatë krizës së emigracionit në Europë në vitin 2015, e cila mbulon rreth një të tretën e kufirit midis dy vendeve, shkruan Euronews.

“Gardhi nuk e ka përmbushur qëllimin e tij, i cili ishte të dekurajonte ata që do të donin të kalonin kufirin”, tha kryeministri i ri i Sllovenisë, Robert Golob.

Golob tha se numri i ardhjeve të paligjshme të emigrantëve është rritur që nga fillimi i vitit. Ai u zgjodh kryeministër muajin e kaluar me premtimin e rikthimit të “normalitetit” dhe demokracisë, pas mandatit të paraardhësit të tij Janez Jansa.

Jansa, një aleat i liderit hungarez Viktor Orban, ka mbrojtur vendosjen e këtij gardhi dhe mjeteve të tjera që synonin të pengonin hyrjen e emigrantëve në tokën sllovene.