Sot takimi i fundit me liderët e Ballkanit Perëndimor, mesazhi i Merkel: Ende nevojitet pajtim

Kancelarja gjermane, Angela Merkel gjatë ditës së sotme do të zhvillojë një konferencë online me liderët e Ballkanit Perëndimor, mbledhja e fundit e saj në mandatin e kancelares.

Në një videomesazh, Merkel u shpreh se është e lumtur që do të mund të vijojë bashkëpunimin me krerët e gjashtë shteteve të Ballkanit Perëndimor: Shqipëria, Bosnjë-Hercegovina, Kosova, Maqedonia e Veriut, Mali i Zi dhe Serbia.

Në mesazhin e saj Merkel kujtoi fillimet e Procesit të Berlinit, të iniciuar nga Gjermania në vitin 2014.

“Si atëherë, ashtu edhe sot qëllimi është të japë ndihmesa sa më konkrete për qëndrueshmërinë e rajonit dhe për dialogun paqësor mes të gjitha palëve”, u shpreh Merkel.

Merkel rikujtoi përgjegjësinë e BE-së dhe të Gjermanisë ndaj Ballkanit Perëndimor.

“Ballkani është një pjesë e Europës ku nuk janë shëruar ende plagët e luftërave të viteve ‘90 dhe dhunës mes grupeve etnike. Për mua është më se e qartë: ne, shtetet anëtare të BE-së jemi shumë të interesuara për një zhvillim paqësor dhe të mirë të Ballkanit Perëndimor. Dhe, ne kemi një përgjegjësi që të angazhohemi faktikisht për këtë”, u shpreh kancelarja gjermane.

Merkel u përqendrua edhe te sfidat e rajonit.

“Ende nuk janë zhdukur mosbesimi dhe nacionalizmat e vjetra, të cilat shumë shpesh ngjallin mosmarrëveshje dypalëshe. Edhe në të ardhmen nevojitet pajtim. Kjo do të thotë që të trajtohet e kaluara, por edhe të bëhet gjithçka e mundshme që brezi i ri të jetojë në paqe. Unë jam e bindur se me konferencat e përvitshme të Ballkanit Perëndimor, ne mund të ndihmojmë në këtë proces”, u shpreh kancelarja, nismëtarja e Procesit të Berlinit.

LEXONI GJITHASHTU:

• Procesi i Berlinit, çfarë pritet të sjellë takimi i fundit i kancelares Merkel me kryeministrat e Ballkanit Perëndimor
• Do të jetë e vështirë të mundet trashëgimia politike e Merkel në Ballkan