Spanja mendon të ndalojë shprehjen e mbështetjes për diktatorin Franco

Qeveria e Spanjës ka kaluar një projekt-ligj që synon të cilësojë të paligjshëm shprehjen e mbështetjes ndaj ish-diktatorit Francisco Franco.

I ashtuquajturi “Ligji për Kujtesën Demokratike”, propozon të ndalojë gjithashtu organizatat që vlerësojnë apo nderojnë politikat dhe udhëheqësit e diktaturës së Spanjës gjatë shekullit të XX-të.

Koalicioni qeveritar i udhëhequr nga socialistët ka kohë që kërkon të nxjerrë jashtë ligjit këdo që mbështet qeverisjen e Francos dhe nënçmon “dinjitetin e viktimave të grushtit të shtetit të 1936, apo të Luftës Civile”.

Projekt-ligji është një tjetër moment historik në qëllimin e qeverisë për të shuar ndasitë në lidhje me vendin që duhet të ketë Franco në historinë spanjolle, por gjithashtu ndez sërish debatin mbi lirinë e shprehjes.

Spanja ka dashur të sigurojë dëmshpërblim për viktimat e Francos dhe të largojë njëherë e mirë ekstremizmin e djathtë, kjo duke pasur parasysh popullaritetin në rritje të partisë së ekstremit të djathtë Vox.

Félix Bolaños, ministri që është caktuar si relator për ligjin, tha se ishte “ligji i parë i Spanjës që dënon dhe hedh poshtë haptazi grushtin e shtetit dhe diktaturën pasuese”.

Diktatura e shekullit XX-të ishte “periudha më e errët e historisë sonë bashkëkohore”, shtoi Bolaños.

Franco ishte gjenerali që udhëhoqi të ashtuquajturat forcat nacionaliste në rrëzimin e republikës gjatë periudhës 1936-1939. Ai drejtoi vendin deri në vitin 1975, kur dhe vdiq nga parkinsoni.

Në vitet e fundit ai riktheu monarkinë duke ia garantuar pushtetin mbretit Juan Carlos, i cili më pas udhëhoqi tranzicionin drejt demokracisë.

Kjo periudhë në historiografinë e Spanjës njihet si “Spanja Frankiste” apo “diktatura Frankiste”.

LEXONI GJITHASHTU:

• Putin merr pjesë në prezantimin e gjeneratës së fundit të avionit luftarak rus
• Sundimi i ligjit, KE ultimatum Polonisë: Ndërroni kurs, ndryshe sanksione
• Brukseli propozon ngritjen e një agjencie për të luftuar pastrimin e parave në BE