Spotify do të rrisë informimin për COVID-19 në aplikacion

Spotify do të shtojë këshillat sa i takon pandemisë në podcast-et (emision në formë radio) që transmeton.

Vendimi erdhi pasi këngëtari Neil Young protestoi për mungesën e informacionit rreth COVID-19 në aplikacion.

“Ne po punojmë për të shtuar këshillimin në çdo episod podcast që përfshin një diskutim rreth COVID-19,” – deklaroi bashkëthemeluesi dhe CEO i Spotify, Daniel Ek, në një postim në faqen e internetit të Spotify.

Dëgjuesit do të marrin të dhëna dhe informacione të përditësuara siç vijnë nga shkencëtarët, mjekët, akademikët dhe autoritetet e shëndetit publik në mbarë botën. Të gjitha burimet do të jenë të besuara, sipas Ek.

Young kërcënoi se nëse Spotify nuk merrte masa do të hiqte këngët e tij nga aplikacioni muzikor.

Rreth 270 ekspertë mjekësorë i kishin shkruar një letër të hapur Spotify në fillim të muajit duke kritikuar podcast-in për “promovimin e teorive të pabaza ” rreth COVID-19.

Spotify, i cili u lançua në vitin 2008, ka më shumë se 381 milionë përdorues, duke përfshirë 172 milionë abonentë.

Këngëtarja Joni Mitchell tha të premten se do të hiqte të gjithë muzikën e saj nga Spotify në shenjë solidariteti me Young.

LEXONI GJITHASHTU:

• Këngëtarja tërhiqet nga Spotify për informacione të rreme mbi COVID-19