Starmer: Britania duhet të përgatitet, lufta në Lindjen e Mesme do të zgjasë

Kryeministri britanik, Keir Starmer tha të hënën se Britania duhet të përgatitet dhe planifikojë mundësinë që lufta në Lindjen e Mesme të zgjasë për disa kohë teksa theksoi se konflikti nuk do të përfundojë shpejt.

I pyetur nga një komision parlamentar ligjvënësish nëse Britania mendon se lufta mund të zgjasë me muaj, në vend të ditëve ose javëve, Starmer tha se mund të vazhdojë për njëfarë kohe.

Ai tha se i gjithë fokusi dhe energjia e Britanisë ishte për një ulje të shpejtë të tensioneve të luftës. Që kur filloi lufta muajin e kaluar, Starmer tha se i kishte thënë ekipit të tij se nuk duhet të bien në atë lloj rehatie të rreme duke menduar se do të ketë një fund të shpejtë.

“E gjithë vëmendja dhe energjia jonë duhet të përqendrohen në uljen e shpejtë të tensioneve, por duhet të planifikojmë mundësinë që situata të vazhdojë për njëfarë kohe”, i tha Starmer.

Më parë, një zëdhënës i Starmer tha se kryeministri kishte mirëpritur çdo raport për bisedime produktive midis Shteteve të Bashkuara dhe Iranit. Presidenti Donald Trump tha se Uashingtoni zhvilloi “biseda produktive” me Teheranin gjatë fundjavës ndërsa Teherani e ka mohuar këtë.