Starmer: Putini mund të përfitojë nga konflikti në Iran, më shumë fokus te Ukraina

Presidenti i Ukrainës, Volodymyr Zelensky, u takua të martën në Londër me kryeministrin britanik Keir Starmer për të diskutuar mbi përpjekjet për paqe dhe forcimin e sanksioneve ndaj Rusisë.

Takimi zhvillohet në një moment kur tensionet në Lindjen e Mesme, përfshirë luftën me Iranin, kanë ndikuar në rritjen e të ardhurave të Rusisë nga nafta dhe kanë zbehur vrullin e bisedimeve të ndërmjetësuara nga SHBA-të për përfundimin e luftës në Ukrainë. Gjithashtu, ekziston shqetësimi se këto zhvillime mund të kufizojnë aksesin e Kievit në sistemet perëndimore të mbrojtjes ajrore.

Gjatë takimit në 10 Downing Street, ku ishte i pranishëm edhe Sekretari i Përgjithshëm i NATO, Mark Rutte, Starmer theksoi se mbështetja për Ukrainën duhet të mbetet prioritet.

“Putini nuk mund të përfitojë nga konflikti në Iran, qoftë përmes çmimeve të naftës apo lehtësimit të sanksioneve,” deklaroi Starmer, duke shtuar se është thelbësore të ruhet presioni ndaj Rusisë.

Nga ana e tij, Zelenskyy bëri të ditur se bisedimet përfshijnë edhe çështje të sigurisë energjetike, pas sulmeve të vazhdueshme ruse ndaj infrastrukturës energjetike të Ukrainës, si dhe zhvillimet në fushëbetejë.