Stërvitje në Estoni/ Mobilizimi ushtarak në Rusi, shteti baltik angazhon rezervistët

Rreth 2 mijë e 900 rezervistë dhe vullnetarë në Estoni po marrin pjesë në një stërvitje 6-ditore, e konsideruar si një përgjigje ndaj thirrjes për mobilizim ushtarak të Rusisë.

Sipas Ministrisë estoneze të Mbrojtjes, stërvitja ka si qëllim perfeksionimin e kapaciteteve luftarake të ushtrisë dhe rezervistëve, edhe pse për momentin ndaj vendit nuk kanoset asnjë rrezik.

“Sot rezervistët janë integruar në një njësi dhe po trajnohen për përdorimin e armëve, me qëllim perfeksionimin e aftësive. Nesër trajnimi do të jetë në nivel skuadre dhe më pas në nivel toge. Synimi është që të përditësojmë të gjitha njohuritë bazike të rezervistëve tanë”- tha nënkolonel Sanna Raudsik, komandant i Batalionit të Zbuluesve.

Stërvitje të tilla mbahen të paktën një herë në vit në shtetin baltik, me vendim qeverie dhe pa njoftuar pjesëmarrësit.

Kjo, pasi rezervistët duhet të jenë gati për të reaguar në çdo moment, ka deklaruar më tej Ministria e Mbrojtjes.

LEXONI GJITHASHTU: 

• Japonia nderon Shinzo Aabe, mbahet mes protestash eventi i kontestuar shtetëror
• Tregtonte mallra kontrabandë, në pranga 37 vjeçari. Sekuestrohen steka me cigare